करिअरनामा ऑनलाईन । पोलिस भरती प्रक्रियेबाबत महत्वाची अपडेट (Police Bharti 2024) हाती आली आहे. महाराष्ट्र पोलीस दलातील वरिष्ठ अधिकारी अपर पोलीस महासंचालक राजकुमार व्हटकर यांनी पत्रकार परिषद घेवून याबाबत माहिती दिली आहे. लोकसभा निवडणुकीमुळे पोलीस भरती प्रक्रिया रखडली होती. मात्र आता 19 जून पासून भरती प्रक्रिया सुरू होणार आहे; अशी माहिती व्हटकर यांनी दिली आहे. महाराष्ट्र पोलीस दलात एकूण 17 हजार पदे रिक्त आहेत. राज्यभरातून या पदांसाठी 17 लाख 76 हजार 256 अर्ज आले आहेत. कारागृह भरती होणार असून 1 हजार 800 पदांसाठी 3 लाख 72 हजारहून अधिक अर्ज आले आहेत; असंही व्हटकर यांनी यावेळी सांगितलं.
पोलीस भरतीची लेखी परीक्षा, मैदानी परीक्षा प्रत्येक जिल्ह्यात होणार आहे. भरतीच्या जाहिरातीत स्पष्ट केल्याप्रमाणे एक उमेदवार दोन ठिकाणी अर्ज करू शकत नाही. मात्र दोन वेगवेगळ्या पदांसाठी अर्ज करू शकतो. विविध पदांसाठी अर्ज केलेल्या उमेदवारांची मैदानी परीक्षा एकाच दिवशी येणार नाही; त्यांना यामध्ये सूट देण्यात आली नाही. भरती प्रक्रियेत शासनाने दिलेल्या आदेशानुसार भरती प्रक्रिया होत आहे, असं राजकुमार व्हटकर यांनी म्हटलं आहे.
ज्या ठिकाणी पावसाचे प्रमाण जास्त असेल त्या दिवशी (Police Bharti 2024) मैदानी परीक्षा ही पुढे ठेवली जाईल आणि तसं उमेदवारांना कळवलं जाईल. राज्याच्या कानाकोपऱ्यातून येणाऱ्या उमेदवारांची व्यवस्थाही आमच्या वेल्फर हाॅल येथे केली जाईल. महाराष्ट्र पोलीस दलाची भरती ही मेरिटनं आणि पारदर्शकपणे होते. दरवर्षी आमच्या ज्या गोपनीय यंत्रणा आहेत त्यांना आम्ही सक्रीय करत असतो; असं राजकुमार व्हटकर म्हणाले आहेत.
उमेदवारांसाठी महत्वाची सूचना (Police Bharti 2024) –
कुठलाही एजंट पोलिस भरतीबाबत आपल्याला आश्वासन देत असेल तर त्यावर विश्वास ठेवू नका. त्यांच्या आमिषाला बळी पडू नका, असं आवाहन राजकुमार व्हटकर यांनी केलं आहे. एखादा एजंट आश्वासन देत असल्याचं निदर्शनास आलं तर आमच्याशी संपर्क करा. मागच्या वर्षी असे प्रकार करण्याचा प्रयत्न करणाऱ्यांवर आम्ही गुन्हा दाखल केलेला आहे, असंही राजकुमार व्हटकर यांनी सांगितलं आहे.
अधिक माहितीसाठी पहा – https://careernama.com
