करिअरनामा ऑनलाईन । तंत्रज्ञानाच्या युगात सध्या नोकरी (Fake Job Scams) शोधणे खूप सोपे झाले आहे; असं म्हटलं तर चुकीचं ठरणार नाही. सध्या अशा अनेक वेबसाईट्स उपलबध आहेत ज्या माध्यमातून तुम्हाला अगदी घरबसल्या जॉब वेकेंसी कुठे आहे हे समजू शकते. पण, तुम्हाला येणारी जॉब ऑफर खरी आहे की खोटी? हे ओळखणे फार कठीण झाले आहे. आज या लेखातून आम्ही तुम्हाला सांगतो की खरी आणि खोटी जॉब ऑफर कशी ओळखायची याविषयी….
खोट्या जॉबच्या ऑफर कशा ओळखायच्या?
नोकऱ्यांसाठी अशा अनेक साइट्स आहेत, जिथे फक्त रेझ्युमे, तुमचे वैयक्तिक आणि व्यावसायिक तपशील अपलोड करून जॉब ऑफर येऊ लागतात. पण ते सर्व बरोबर आहेत की नाही? याबाबतची शंका कायम असते. सायबर क्राईम पोलिसांत यासंदर्भातील अनेक फसवणुकीच्या तक्रारी येत असतात. त्यामुळे खोट्या जॉबच्या ऑफर कशा ओळखायच्या? त्यातून कसं स्वत:ला वाचवायचं? याचा तपशील पाहूया….
….तर असू शकते सायबर फसवणूक (Fake Job Scams)
आपल्याला बऱ्याचदा ई मेलवर जॉब ऑफर येते. यामध्ये आपल्याला चांगले पद आणि पगाराची नोकरी ऑफर झालेली असते. पण या आनंदाच्या भरात आपण त्या ईमेल आणि जॉब ऑफरची सत्यता तपासत नाही. कोणतीही मुलाखत न घेता आकर्षक पगाराच्या पॅकेजसह ऑनलाइन जॉब ऑफर येत असेल तर ही सायबर फसवणूक असू शकते.
कशी होते नोकरीच्या नावे फसवणूक –
– तुमच्याकडे कामाचा कोणत्याही प्रकारचा अनुभव नसेल आणि तरीही तुम्हाला मोठे प्रोफाइल आणि पगाराची ऑफर येत असेल. तर संशय निर्माण होण्याची स्थिती आहे.
– तुम्हाला स्पॅम ई-मेलद्वारे नोकरीची ऑफर आली असेल तर वेळीच सतर्क होणे आवश्यक आहे. असे ऑफर लेटर कधीही स्वीकारू नका. त्यावर क्लिक करण्याचीही गरज नाही.
– अनेक वेळा बनावट वेबसाईटच्या माध्यमातून नोकरीची जाहिरात केली जाते. कुठेही अर्ज करण्यापूर्वी किंवा ऑफर लेटर स्वीकारण्यापूर्वी ती वेबसाइट नीट तपासा.
– उमेदवारांना चांगल्या पदाचे आणि जास्त पगाराच्या पॅकेजचे आमिष दाखवून त्या बदल्यात पैशांची मागणी केल्याचे अनेक वेळा दिसून येते. (Fake Job Scams)
– अनेकदा राज्य किंवा देशाबाहेरील नंबरहून नोकरीसाठी फोन येतात. नोकरीसाठी पैसे भरण्यास सांगितले जातात. त्या नंबरवर पुन्हा फोन लागत नाहीत; अशावेळी सतर्क राहणे आवश्यक आहे.
जॉब ऑफरची सत्यता कशी तपासायची?
1. ऑफर लेटरमध्ये नोकरीच्या भूमिकेशी संबंधित माहिती नीट वाचा. यामध्ये काही अटी असतील तर समजून घ्या अन्यथा चुकूनही त्यावर सही करू नका.
2. कंपनीचे अधिकृत सोशल मीडिया प्रोफाइल तपासा. गुगलवर कंपनीबद्दलचे रिव्ह्यू तपासा. यातून तुम्हाला माहिती मिळेल.
3. कंपनीचा लोगो, नाव आणि इतर तपशील नीट तपासा. वेगवेगळ्या प्लॅटफॉर्मवर देखील क्रॉस चेक करा. तुमच्या ओळखीत तिथे कोणी नोकरी (Fake Job Scams) केली का ते पहा. केली असेल तर त्यांच्याकडून माहिती घ्या.
3. ऑफर लेटर तुम्हाला अधिकृत ईमेल आयडीद्वारे पाठवले गेले आहे की नाही ते तपासा. अनेकदा आयडी अधिकृत दिसत असला तरी प्रत्यक्षात तो फेक असतो.
या स्टेप्स नुसार पडताळणी करून तुम्ही नोकरीच्या बाबतीत सत्यता तपासू शकता.
अधिक माहितीसाठी पहा – https://careernama.com
