Maha Forest Recruitment 2024 : वन विभागात भरतीचा मार्ग खुला; 1256 पदे भरण्याचा शासनाचा मोठा निर्णय!!

करिअरनामा ऑनलाईन । वनरक्षक होण्याचे तुमचे (Maha Forest Recruitment 2024) स्वप्न पूर्ण होणार आहे; कारण शासनाकडून या भरती प्रक्रियेबाबत मोठा निर्णय घेण्यात आला आहे. वन विभागात वनरक्षकांची तब्बल 1256 पदे भरली जाणार आहेत. ही भरती प्रक्रिया राबवण्याचा निर्णय राज्य शासनाने घेतला आहे. ही प्रक्रिया वेगात पूर्ण करण्याचे निर्देश वनमंत्री सुधीर मुनगंटीवार यांनी दिले आहेत. ही भरती प्रक्रिया गेल्या काही दिवसांपासून खोळंबली होती. मात्र शासनाने यामधून मार्ग काढत उमेदवारांना मोठा दिलासा दिला आहे.

खोळंबलेल्या भरती प्रक्रियेस चालना मिळणार 
शासनाने 2138 वनरक्षक पदांसाठी जाहिरात प्रसिद्ध केली होती. या 2138 वनरक्षक पदांसाठी 2 ऑगस्ट ते 11 ऑगस्ट 2023 या कालावधीत ऑनलाईन पद्धतीने टिसीएस (TCS) आयओएन मार्फत परीक्षा घेण्यात आली होती. मात्र, अनुसूचित क्षेत्रातील शासकीय पदभरती प्रक्रियेस सर्वोच्च न्यायालयात आव्हान देण्यात आल्याने सर्वच पदभरती प्रक्रिया बाधित झाली. त्यामुळे सर्वच भरतीच्या प्रतिक्षेत असलेल्या (Maha Forest Recruitment 2024) उमेदवारांमध्ये अस्वस्थता पसरली होती. शेवटी यामधून मार्ग निघाला असून खोळंबलेल्या पदभरती प्रक्रियेस आता चालना मिळाली आहे. त्यानुसार शासनाने अनुसूचित क्षेत्र (पेसा) सोडून उर्वरित 1256 वनरक्षक पदांची भरती करण्यास मान्यता दिली आहे. या निर्णयामुळे वनरक्षक पदभरतीच्या प्रतिक्षेत असलेल्या सुमारे चार लाख युवा उमेदवारांना दिलासा मिळाला आहे.

अशी होणार निवड (Maha Forest Recruitment 2024)
1. ऑनलाईन परीक्षा आणि प्रत्यक्ष धाव चाचणी यांचे मार्क एकत्र करून नवीन गुणवत्ता यादी तयार केली जाईल. या नवीन गुणवत्ता यादीनुसार पात्र ठरलेल्या उमेदवारांच्या यादीला प्रादेशिक निवड समितीकडून मान्यता मिळाल्यानंतर अंतिम टप्प्यात निवडसूचीतील उमेदवारांची 25 कि.मी. आणि 16 कि.मी. चालण्याची चाचणी घेण्यात येईल.
2. या अंतिम चाचणीतून पात्र उमेदवार निवडून त्यांच्यामधून वनरक्षकांची नियुक्ती करण्यात येईल. ही सर्व प्रक्रिया 17 जानेवारी पासून सुरू करण्यात येणार असून वन वृत्तातील उमेदवार संख्येनुसार 15 दिवस ते 44 दिवस या कालावधीत ही प्रक्रिया पूर्ण केली जाईल.
याभरतीमुळे वनरक्षक पदाच्या भरतीच्या प्रतिक्षेत बराच काळ असलेल्या युवा उमेदवारांची प्रतिक्षा संपली असून 1256 वनरक्षकांची भरती प्रक्रिया पूर्ण करण्याचा निर्णय शासनाने घेतला आहे.
अधिक माहितीसाठी पहा – https://careernama.com